មុនការទិញយកដោយក្រុមហ៊ុន Microsoft ក្រុមហ៊ុន Nokia ធ្លាប់ជាក្រុមហ៊ុនផលិតទូរសព្ទយក្សមួយនៅលើពិភពលោក។ តទៅនេះគឺជាការរំលឹកនូវទូរសព្ទល្អៗចំនួន១០ដែល Nokia បានផលិតឡើងនាពេលកន្លងមក។
១០. Nokia 7210
7210 ជាទូរសព្ទដំបូងគេដែលមាននូវអេក្រង់ពណ៌ធម្មជាតិទំហំ១,៥អ៊ីញ និងមាន Resolution ទំហំ១២៨x១២៨។ ទូរសព្ទនេះដែរបានចេញលក់លើទីផ្សារនៅក្នុងឆ្នាំ២០០២។
៩. Nokia N91
N91 បានចេញលក់នៅឆ្នាំ២០០៥ ហើយវាប្រហែលជាទូរសព្ទមានរូបរាងអាក្រក់ជាងគេក្នុងចំណោមទូរសព្ទដែល Nokia បានផលិត។ ទោះជាយ៉ាងណាពេលនោះទូរសព្ទនេះមានអង្គផ្ទុកទិន្នន័យទំហំធំជាងគេបង្អស់ដល់ទៅ៤GB ហើយទទួលបានការពេញនិយមរហូតដល់មានការផលិតបន្ថែមនូវស៊េរីអង្គចងចាំទំហំ៨GB ដែលមានពណ៌ខ្មៅជាពិសេសទៀតផង។
៨. Nokia N900
ទូរសព្ទនេះបានចេញលក់ក្នុងឆ្នាំ២០០៩ វាជាប្រភេទស្មាតហ្វូនដែលមានអេក្រង់ទំហំ៣,៥អ៊ីញ ដោយអេក្រង់វាមានលក្ខណៈពិសេសអាចធ្វើការទាញចេញដើម្បីប្រើប្រាស់ក្ដារចុចបាន។ N900 មិនមានចំណុចទាក់ទាញអ្វីជាពិសេសនោះឡើយ ប៉ុន្តែអ្នកដែលទិញស្មាតហ្វូននេះស្រឡាញ់មិនអាចដកចិត្តពេលបានប្រើ។
៧. Nokia 808 PureView
កាលពីឆ្នាំ២០១២ ក្រុមហ៊ុនNokia បានប្រកាសពី 808 PureView ដែលមានបំពាក់នូវកាមេរ៉ាយក្សទំហំ៣៨MP អាចយកឈ្នះគូប្រកួតប្រជែងនានាបាន។
៦. Nokia E71
E71 គឺជាគូប្រកួតប្រជែងដ៏ខ្លាំងក្លាមួយរបស់ក្រុមហ៊ុន Blackberry កាលពីឆ្នាំ២០០៨។ វាមិនត្រឹមតែមានសមត្ថភាពនិងរូបរាងស្អាតជាងទូរសព្ទរបស់ក្រុមហ៊ុន Blackberry ប៉ុណ្ណោះទេ តែថែមទាំងមានតម្លៃទាបជាងទៀតផង។
៥. Nokia 8210
បើក្រឡេកទៅឆ្នាំ១៩៩៩ Nokia 8210 ជាទូរសព្ទដ៏អស្ចារ្យមួយ។ វាមានទម្ងន់តែ៧៩ក្រាម មានអង្គចងចាំដែលអាចរក្សាលេខទូរសព្ទបាន២៥០លេខ និងអាចប្រើប្រាស់បានដល់ទៅ៧៥ម៉ោងឯណោះ។
៤. Nokia N9
Nokia N9 បានបង្ហាញខ្លួននៅក្នុងឆ្នាំ២០១១ វាជាស៊េរីថ្មីរបស់ N900 ដែលអ្នកប្រើប្រាស់បានទន្ទឹងរង់ចាំអស់រយៈពេល៣ឆ្នាំមកហើយ។ ត្បិតថាវាត្រូវបានរចនារូបរាងស្រស់ស្អាតជាង N900 ក៏ពិតមែន ប៉ុន្តែមិនបានទទួលជោគជ័យដូចការរំពឹងទុកនោះឡើយ។
៣. Nokia N95
N95 ជាទូរសព្ទប្រចាំប្រវត្តិសាស្ត្រមួយរបស់ក្រុមហ៊ុន Nokia។ ទូរសព្ទនេះត្រូវបានរចនាឡើងជាពិសេសដោយមានប្រព័ន្ធគ្រប់គ្រងចម្រៀងស្ថិតនៅផ្ទៃខាងក្រោយនៃផ្នែកខាងលើអេក្រង់ទូរសព្ទ នៅពេលអូសអេក្រង់ចុះក្រោម។ វត្តមានរបស់ទូរសព្ទនេះទទួលបានការគាំទ្រយ៉ាងខ្លាំងពីសំណាក់អ្នកប្រើប្រាស់រហូតដល់មានការចេញលក់នូវ N95 ទំហំ៨GB ពណ៌ខ្មៅជាពិសេសថែមទៀតផង។
២. Nokia 5110
នៅឆ្នាំ១៩៩៨ Nokia 5110 ជាទូរសព្ទដំបូងគេដែលមានមកនូវហ្គេមពស់ដ៏ល្បីឈ្មោះ។ ហ្គេមពស់របស់ Nokia ត្រូវបានគេប្រៀបប្រដូចទៅនឹងហ្គេម Super Mario ដែលគ្មានអ្នកណាអាចបំភ្លេចបានឡើយ។
១. Nokia 8810
ទូរសព្ទរបស់ក្រុមហ៊ុន Nokia ដែលគេមិនអាចបំភ្លេចបាននោះគឺ 8810។ តួខ្លួនលោហៈធាតុបានធ្វើឱ្យទូរសព្ទនេះមានការលំបាកក្នុងការផលិតរហូតដល់មានការកំណត់ចំនួនផលិតទៀតផង។ 8810 ដែលបានផលិតឡើងនាឆ្នាំ១៩៩៨នេះបានត្រួសត្រាយផ្លូវសម្រាប់ភាពជោគជ័យរបស់ក្រុមហ៊ុន Nokia ៕
